571
Срамот нѐ придружува во нашето секојдневие и постоење, потпирајќи се на нашето минато, каде што, случајно или намерно, се случиле некои грешки, некои пропусти, а ставајќи нѐ пред свршен чин – на суд. Судот на нашиот сопствен ум, нашата најголема слабост.
Погледнете ги (не)видените дела на илустраторите на Скала коишто, овој месец, твореа на тема „СРАМ“. Мини виртуелната изложба ги покажува само дел од облиците на срам коишто ги чувствуваме, од коишто бегаме или со коишто се соочуваме.
___ Андреј Павлов
Андреј за себе вели дека е илустратор. А ние за него велиме дека е многу повеќе! Тој не е само илустратор, Андреј е и фотошоп, индизајн и дип. индустриски дизајнер. Кога ќе порасне сака, да биде супер херој! Како ли не му е срам.
___ Ива Јованова
Ива пее во бенд! Но, црта и згради, зашто тоа учеше на факултет. Но, Ива и дизајнира, фотографира... Исто така, многу сака кучиња и мачиња и други такви слатки работи. Кога ќе порасне сака да собира школки и убави каменчиња. Како ли не ѝ е срам.
___ Стефан Танков
Стефан ни доаѓа од Архитектонски факултет, таму ги привршува своите мастер студии. Тоа се оние дечки и девојки кои шетаат низ град со големи папки во рацете. Мултидисциплинарен артист и мултиљубопитен дух. Кога ќе порасне, сака да биде и да остане свој. Како ли не му е срам.
___ Деница Стојкоска
Деница е студентка по ликовна педагогија на ФЛУ, а ги знае сите трачеви на ФДУ. Повеќе информации за овој трач – идниот месец во истата рубрика. Кога ќе порасне, сака да биде учителка, наставничка, декан и ректор! Како ли не ѝ е срам.
Заедничко на оваа креативна банда е тоа што се дел од креативниот тим на „Скала магазин“ и студенти на академиите за дизајн при „Џолев и уметностите“. Толку многу сличности, а само еднаш месечно пиво пијат. Срамотилаци!