ЕДНАШ МЕСЕЧНО ВО САНДАЧЕ НИ ПРИСТИГA „ПИСМО ОД ДИЈАСПОРАТА“. ЦЕЛТА НА ОВАА РУБРИКА Е ДА СЕ ЗАПОЗНАЕМЕ СО МЛАДИТЕ АВТОРИ И СТУДЕНТИ ПО ДИЗАЈН И УМЕТНОСТ КОИ РАБОТАТ ОДНОСНО СТУДИРААТ НАДВОР ОД ДОМАШНAТА АДРЕСА.
СИМОН КАЛАЈЏИЕВ // ВИЗУЕЛЕН АРТИСТ //
Драга Скала,
Токио е пространа метропола со 30 милиони жители и една од најголемите економии во светот. Секој може да најде се што го интересира и да е во чекор со најовите случувања во секое поле, што и да е тоа.
Роботи и диносауруси, тоа се две од моите најголеми опсесии, покрај уметноста. Оваа недела имав можност да се наситам на сите три. Бев во неколку кафичи со роботи, посетив две палеолошки изложби и бев на изложба за Бенкси!
1. Гандам во Акихабара
Гандам е една од моите омилени теми од научна фантастика. Колекционирам Гандам-макети. Тоа е едно од најпопуларните хобија во Јапонија. Го посетив Тамаши Нејшнс промотивниот центар во Акихабара, особено за промоцијата на новата серија макети-Гандам со метални делови. Со детали и декали, сјајни и мат-површини, совршена изработка и подвижност, овие модели се новиот скок во оваа индустрија. Без потреба од никаква дополнителна доработка, новите модели изгледаат речиси подеднакво спектакуларно како ремек-делата на врвните хобисти кои посветуваат по неколку месеци во изготвување на една макета.
Во близина има и Гандам Кафе. За првпат го посетив новиот дел, Зион ресторан. Масата е истовремено и интерактивен проектор со виртуелна игра. Кога нарачав јадење и пиење персоналот ми објасни како да учествувам во играта. Секој муштерија може да ги користи подметачите како марионети за да ги управува роботите во играта со кои располага. Со секоја нова нарачка добиваш повеќе поени во играта и можеш да активираш посилни роботи. Додека јадев, битката се одвиваше пред мои очи, војниците самостојно се бореа по мојата команда, сѐ додека не им дадов нова наредба.
Кога веќе бев во Акихбара, се задржав подолго и подоцна вечерав во уште еден интересен локал, Платинум Фиш Кафе. Овде се наоѓа еден од најстарите железнички перони во Токио. Денес, перонот не е во употреба, но возовите сѐ уште врват по пругите. На место на некогашната станица Мансеибаши, има мал музеј и кафуле. Јадев кари, пиев џинџер ејл, дoдека на лево и на десно, поминуваа возови на само неколку метри од мојата маса.
2. Диносауруси во Јокохама
Во еден ден, фатив две изложби на фосили од диносауруси во Јокохама. Изложбата „Дино наука“ (DinoScience) со поддршка на Сони, претстави на јавноста десетина новооткриени скелети коишто се изложени премиерно за првпат во светот! Неколку од нив припаѓаат на видови што се сѐ уште неименувани. Главната атракција на поставката беа Трицератопсот, наречен Лејн и Тираносаурусот Стен. Досега, најдобро зачуваниот примерок од Трицератопс којшто бил откриен, Лејн, е пронајден со фосилизирано парче кожа, за првпат овозможувајќи да дознаеме точно како изгледале крлушките и боцките на овие праживотни.
Изложбата GR8! Кобурина Кјорју Тен е многу забавен начин да се развесели и осовремени една палеолошка поставка со графити и мурали. Јапонскиот уметник Јоичиро ја координирал поставката и за секој експонат, изработил уметничко дело како илустрација во стил на улична уметност.
3. Бенкси изложба на Тенозу
Отидов на изложбата „Кој е Бенкси?“ и се изненадив од лимовите и деловите од ѕидови со препознатливите Бенкси шаблонски дела, небаре откорнати од местото каде што биле најдени и поставени така во галерија. Имаше и многу рекреирани сцени од локали каде што се изработени некои од пославните дела, оживеани со звуци од улицата и динамично осветлување. Бенкси сѐ уште ја нема посетено Јапонија во творечка мисија, па ова беше единствена можност Токио лично да се соочи со моќната порака на овој енигматичен автор.
Веднаш до галеријата, се наоѓа Пигмент, уникатна продавница, специјализирана за продажба на сликарски пигменти и едно од ретките места во светот каде што може да се најдат сите пигменти што постојат. Ентериерот е дизајниран од славниот јапонски архитект Кенго Кума, дизајнерот на новиот олимписки стадион во Токио. Кога веќе поминував, решив да си ја обновам палетата со неколку луксузни пигменти.
4. Робот-кафе
Мојата сопруга Зориа е уредник на магазинот „Токио Викендер“ и со неа често сме поканети на отварање на нови атракции и локали. Оваа недела бевме на промоција пред отварање на два нови кафиќи, посветени на интерактивни роботи, едниот на Шибуја Стрим, а другиот во моето маало, на Накамичи во Кичиџоџи. Ловот (LOVOT) се софистицирани роботи, дизајнирани да освојат сечие срце. На допир се топли и меки, се движат и мрдаат кротко, милно, барајќи внимание, а ако си поиграте со нив, се радуваат. Имаат сензори низ целото тело и реагираат на секој допир. Уживаат во галење, се кикотат и гугаат. Наместо звучник, имаат нов изум, говорен апарат со вештачки гласни жици и секое од нив има свој уникатен глас. Покрај нив, имаше уште неколку нови модели на роботчиња, меѓу кои Робохон, кој пее и танцува и Микси, кој одговара на секое прашање со импровизирана песна и мелодија. Во кафулињата се добредојдени сите кои се прашуваат каква е иднината на соживот со роботите и можат да играат и разговараат со нив колку сакаат.
Наскоро планирам да го посетам новиот џиновски Гандам-робот што оди, висок 15 м, во Гандам-базата во Јокохама. Следете ме на Фејсбук, Инстаграм и Твитер, ќе ставам слики, а може и ќе стримам во живо од локација.
https://www.instagram.com/kalajdjiev/
Поздрав од Токио!
Се читаме повторно во следна прилика.
Ваш Симон
